ILOILO CITY – Nagapadayon ang assessment sang Provincial Cooperatives Development Office sa mga consolidated traditional jeepneys sa probinsya.
Sa interview sang Bombo Radyo kay Board Member Ramon Sullano, chairman sang Committee on Transportation sa Sangguniang Panlalawigan, iya ginpahayag nga upod sa Committee on Public Utilities, naga-assist ang iya opisina sa mga transport groups kun paano masolusyunan ang ila nga problema sa consolidation sang mga traditional jeepneys nga kabahin sang modernization program.
Samtang, pabor man si Board Member Sullano sa pahayag ni Presidente Ferdinand Marcos, Jr. kag sang mga senador nga indi tanan nga mga traditional jeepneys ang dapat nga i-phase out.
Suno kay Sullano, dapat nga ikonsiderar anay ang mga jeep nga makabig pa nga road worthy agud nga indi makahatag sang perwesyo sa mga operators kag sa drivers.
Maayo suno sa opisyal nga ginpalawig ang pag-phase out sang mga traditional jeepneys tubtob sa Disyembre 31, 2023 agud nga matun-an sang maayo sang gobyerno.
May kaangtanan naman sa plano nga strike sa National Capital Region kag sa iban nga rehiyon sa Marso 6 tubtob 12, wala sang ideya si Sullano nga may yara sang mapasakup nagikan sa probinsya.
