ILOILO CITY – Nagdangat na sa P200, 000 ang nagahulat nga cash reward para sa makatudlo sa mga suspek nga naghold-up sa opisina sang J&T Express sa Mc Arthur Drive, Brgy Quintin Salas, Jaro, Iloilo City.
Ini matapos nga gindugangan ni Iloilo City Lone District Representative Jamjam Baronda sang P100, 000 ang nauna nga P100, 000 nga reward ni Iloilo City Mayor Jerry Treñas.
Sa interview sang Bombo Radyo kay Baronda, iya ginpahayag nga ang kwarta ang kuhaon niya sa iya personal nga bulsa agud nga masolbar sa labing madali nga panahon ang robbery-hold up incident.
Suno sa kongresista, ginatinguha-an gid sang mga opisyal nga mapasanyog ang turismo sang syudad gani, indi maayo nga mahigku-an ini sang krimen.
Subong nga adlaw, nadakpan na ang isa sa mga suspek sa Barangay Guinobatan, Leganes, Iloilo.
Ini ang ginkilala kay John Mark Lebuna, residente sang Barangay San Isidro, Jaro apang nagtinir sa iya nobya sa nasambit nga banwa.
