Nag-withdraw na si World No. 1 Novak Djokovic sa Indian Wells Open subong nga semana, indikasyon nga posible napaslawan ang iya application nga magsulod sa Estados Unidos sang Amerika nga wala sang Covid-19 vaccination.
Ang Serbian star isa sa most high-profile athletes sa kalibutan nga tubtub subong wala pa nabakunahan batok sa Covid-19.
Nag-apply siya sang nagligad nga bulan para sa special permission agud maghampang sa Association of Tennis Professionals (ATP) Masters events sa Indian Wells kag Miami.
Nahibaluan nga sa subong, ginadumilian sang US nga makasulod sa pungsod ang indi bakunado nga mga dumuluong, isa ka policy nga ginalauman nga ma-lift naman kun matapos na ang COVID-19 emergency sa US sa Mayo 11.
Matandaan nga ang 35-anyos nga winner sang 22 ka Grand Slam titles ang nangin kampyeon man sa Australian Open sang nagligad nga bulan, kag siya man ang heavy favorite nga makakuha sang iya ika-anum na kuntani nga Indian Wells title. ##
