ILOILO CITY – May pinasahi nga pamaagi sa pagbaligya sang droga ang durugista nga nadakpan sang damlag lang sa Barangay San Jose, San Miguel, Iloilo.
Ang durugista amo si Cland Bayoneta, 33, fish vendor kag residente sang Poblacion South, Oton, Iloilo.
Nakuha sa iya ang 17 ka sachet sang shabu nga may standard drug price nga P21, 000.
Sa interview sang Bombo Radyo kay Police Major Sullen Domingo, hepe sang San Miguel Municipal Police Station, iya ginpahayag nga ginabutang sang durugista ang shabu sa hasang sang ginabaligya nga isda ukon ginabutang sa plastic nga ginasudlan sang isda.
Suno kay Domingo, si Bayoneta nga isa ka street level individual ang gintudlo nga source sang droga sang isa man ka durugista nga nadakpan man sang mga otoridad.
Sa subong, preso na si Bayoneta sa San Miguel Municipal Police Station kag magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
