ILOILO CITY – Nagmandu si Iloilo City Police Office- Officer in charge Police Colonel Joeresty Coronica sa tanan nga mga station commanders nga magpatigayon sang assessment sa ila jurisdiction sang compliance sang mga establishments sa Closed-circuit Television Ordinance sang syudad.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga sa tion nga magbalik na si Iloilo City Mayor Jerry Treñas, i-presentar ini Coronica.
Base sa ordinansa, requirement sa pagkuha sang permit ang functional nga closed-circuit television.
Samtang, sa police operation naman, ginpahayag ni Sangrines nga dako ang mabulig sang closed-circuit television camera sa pagsolbar sang krimen.
Ginpahayag dugang sang natungdan nga kun may yara gid man sang surveillance camera ang establishment, indi functional ukon indi high definition.
Ginklaro ni Sangrines nga wala man nagasalig sa closed-circuit television camera ang kapulisan apang, mas maayo kun may yara sang naka-install bangud nga dako ang mabulig sini sa imbestigasyon sang otoridad.
Kung madumduman, sa pinakaulihi nga robbery incident sa distrito sang Jaro, wala sang may naka-install nga closed-circuit television camera kag security guard nga naka-detail rason nga nataban gid ang P600,000 nga kwarta.
Nadakpan naman ang isa ka suspek nga nagpanginwala nga may kahilabtanan sa pagpang-hold up.
