ILOILO CITY – Nagmandu si Iloilo Governor Arthur Defensor, Jr. sa Iloilo Police Provincial Office nga magpatigayon sang regular nga threat assessment sa mga alkalde sa probinsya.
Kahapon, ginsapol ni Governor Defensor ang mga alkalde upod ang Iloilo Police Provincial Office.
Sa interview sang Bombo Radyo kay Police Colonel Ronaldo Palomo, director sang Iloilo Police Provincial Office, iya ginpahayag nga dapat padayon ang proseso kag kun mahimo, himuon ini sa tagsa ka tatlo ka bulan agud nga mahibaluan kun may yara sang pamahog sa ila kabuhi.
Sa mga alkalde nga nagtambong, nagpahayag sang intensyon si Janiuay, Iloilo Mayor Paul Parian nga mag-request sang security ilabi na nga masami ini nagapadulong sa kabukiran nga may presensya sang rebelde nga grupo.
Nagpasalig si Palomo nga mahatag sila sang seguridad kun may yara sang pamahog sa kabuhi sang opisyal.
Ginpaathag man ni Palomo sa mga alkalde ang proseso kun paano mag-avail sang security.
Samtang, ginklaro ni Palomo nga wala sang may naga-eksister nga armed group sa probinsya kundi, duha lamang ka mga criminal gangs.
Ang duha ka mga gangs amo ang Lebuna robbery group kag Bagatnan roberry group nga naka-base sa Central Iloilo apang naga-operate sa bilog nga probinsya.
Bangud sini, nag-deploy na sang tracker teams ang Iloilo Police Provincial Office agud nga malagas ang mga criminal gangs kag ma-dissolve na.
Samtang, nagtutok sa seguridad sang mga alkalde ang pagsinapol nga ginpatawag ni Iloilo Governor Arthur Defensor, Jr. upod sa mga alkalde sang probinsya kag sa Iloilo Police Provincial Office.
Sa interview sang Bombo Radyo kay Governor Defensor, iya ginpahayag nga naistoryahan man ang working relation kag coordination sang mga alkalde sa kapulisan sa probinsya.
Suno kay Defensor, i-deliberate ang regular kag systematic update sa security situation sang ila nga banwa nga resulta na sang intillegence work kag meeting.
Ini agud nga makahimo sang adjustment agud nga makapangaman ang mga alkalde bangud nga may yara sang security personnel nga ginahatag ang gobyerno depende sa threat assessment.
Ginhambalan man ang iban nga aspeto sang peace and order sa probinsya.
Ginpalab-ot man sang gobernador ang nahambalan sa ginpatawag nga pagsinapol sang Department of the Interior and Local Government kag Philippine National Police sa Camp Crame.
Sa subong, ginpahayag ni Defensor nga wala sang pamahog nga nabaton ang mga local chief executives sa probinsya sang Iloilo.
Sa tion nga may yara gid man, nagpasalig ang gobernador nga magapatuman siya sang adjustment sa security sa probinsya.
Ginklaro sang gobernador nga wala man siya nakulbaan sa natabo sa probinsya sang Negros Oriental kun sa diin, gin-assassinate si Governor Arthur Defensor, Jr., apang ini ang nagapahanumdom nga mangin conscious sa seguridad kag maghimo sang adjustment sa trabaho.
