Aprubado na sang National Economic and Development Authority (NEDA) ang 194 ka infrastructure projects balor P9-trillion agud nga mapasangkad pa ang “Build Better More” program sang gobyerno.
Suno kay NEDA Director General Arsenio Balisacan, 123 sa sini nga infrastructure flagship projects ang gin-umpisahan sang Marcos administration samtang ang nabilin naman ang naghalin pa sa nagligad nga administrasyon.
Lakip sa bag-o nga railway projects sa guwa sang Metro Manila amo ang Panay Railway Project, Mindanao Railway Project II, North Long Haul Railway, kag ang San Mateo Railway.
Ang Panay Railway ang natukod sang American colonial period kun sa diin ang original nga ruta sang tren amo ang Iloilo City pa- Roxas City, Capiz lakip na ang 19 ka permanent kag 10 ka flag stations.
Nag-untat ini sang operasyon sang 1985.
Duha ka dekada na nga gina-istoryahan ang revival sang Panay Railway kag ang gina-propose amo ang pag-extend sini sa Malay, Aklan kun sa diin nahamtang ang Boracay Island.
Ginpahayag man nga maga-cover ini sang bag-o nga railway route halin sa Caticlan, Malay, Aklan pa San Jose, Antique; kag halin sa San Jose, Antique pa Iloilo City via San Joaquin kag Miag-ao sa probinsya sang Iloilo. ##
