ILOILO CITY – Ginalauman nga yara na sa katapusan sang bulan sang Marso subong nga tuig ang rekomendasyon para sa Ungka Flyover nagikan sa gin-hire nga highly technical consulting firm.
Sa interview sang Bombo Radyo kay Engr. Jose Al Fruto, assistant regional director sang Department of Public Works and Highways Region VI kag nagaserbe nga focal person sa Ungka Flyover, iya ginpahayag nga sang Marso 3 lamang ginhatag sa firm ang notice to proceed.
Apang suno kay Fruto, tatlo pa ka bulan ang engagement sang firm bangud nga madamo sang proseso sa assessment apang, nag-commit sila nga sa katapusan sang bulan mahatag na ang recommendation.
Sa tion nga yara na ang rekomendasyon, gilayon nga planuhan ang himuon sa Ungka Flyover.
Ang pondo nga gingamit para sa assessment sa flyover ang ginkuha sa 2023 General Appropriations Act.
Sa subong, samtang nga ginahulat ang rekomendasyon suno kay Fruto, ginpalapad ang dalan sa kilid sang flyover.
Nagdugang man sang loading and unloading areas sa lugar.
Nagpangayo man sang pasaylo ang ahensya kag gamay nga pag-intindi nagikan sa publiko.
