Nag-request si Iloilo Police Provincial Office Director Police Colonel Ronaldo Palomo sa 7 Aces Games and Amusement Corp., ang nagaisahanon nga Authorized Agent Corporation nga naga-operate sa Iloilo, sang listahan sang mga lugar nga may legitimate agents.
Ini ang isa sa mga tikang nga himuon ni Palomo agud nga mapapas ang illegal gambling sa probinsya sang Iloilo.
Sa interview sang Bombo Radyo kay Palomo, iya ginpahayag nga iga-require ang tanan nga mga hepe sa probinsya nga magpatigayon sang operasyon sa tion nga mahibaluan ang mga illegal gambling operators.
Sa subong, wala pa nakapasa sang listahan ang 7 Aces Games and Amusement Corporation.
Ginpasalig man ni Palomo nga padayon ang pag-monitor sang mga kapulisan sa probinsya ilabi na nga isa man ini sa mandu ni Iloilo Governor Arthur Defensor, Jr. sa pag-intensify sang kampanya.
Ang presensya sang illegal gambling operators pahayag sang gobernador ang naga-resulta sang revenue loss.
Nahibaluan nga humalin sang Enero 1 tubtob Marso 1 subong nga tuig, naka-rekord ang Police Regional Office 6 sang 227 anti-illegal gambling operations nga nag-resulta sa pagkadakop sang 718 ka mga indibidwal kag pagkumpiska sang P175,949 nga bet money.
Mangin si Police Regional Office 6 Director PBGen. Leo Francisco ang nagmandu man sa mga commanders, lakip na ang provincial kag city directors nga pabaskugon pa ang kampanya kontra illegal gambling.
