ILOILO CITY – Gina-consider nalang sang Rufino G. Palabrica Sr. National High School sa Dingle, Iloilo ang mga estudyante nga ma-late bangud sa perwesyo nga natuga sang wala sa gihapon nakay-o nga Monfort Bridge nga naguba sang Bagyo Agaton sang nagligad nga tuig.
Ang mga estudyante ang nagapila sang malaba agud nga makasakay sa balsa.
Sa interview sang Bombo Radyo kay Mr. Sony A. Panisales, Principal I kag officer in charge sang Rufino G. Palabrica Sr. National High School, iya ginpahayag nga 446 ka mga estudyante sa nasambit nga eskwelahan ang adlaw-adlaw nga nagasakay sa balsa agud lamang nga maka-eskwela.
Suno kay Panisales, umpisa sang narumpag ang taytay, madamo sang nagaka-late nga mga estudyante kag naapektuhan ang pag-eskwela.
Bangud sini suno sa natungdan, ang mga estudyante ang ginapahanugutan nga magsulod sa eskwelahan 7:30 sa aga sa baylo nga 7:15 am.
Sa hapon naman, ang mga junior high school students nga nagasakay sa balsa ang ginapahanugutan nga magpauli alas-4 sa hapon sa baylo nga 4:30.
Ang mga senior high school students naman ang ginapahanugutan nga magpauli 4:30 sa hapon sa baylo nga alas-singko.
Nagpapanaog sang memorandum si Panisales sa mga manunudlo kag security guards agud lamang nga ma-consider ang mga estudyante nga ginhatagan sang gate pass.
Sa tion naman nga mag-ulan suno sa natungdan, naga-shift sa modular distance learning ang ang mga estudyante tubtob nga magnabaw ang tubig sa suba kag maka-agi ang mga estudyante.
Sa pihak sini, nagpasalig ang eskwelahan nga indi maapektuhan ang grades sang mga kabataan.
Nahibaluan nga ang pagkay-o sang Monfort Bridge ang matapos na kuntani sa masunod nga bulan, Abril 19, 2023 base sa project billboard.
Septyembre 2023 sang gin-award sa A.D. Pendon Construction and Supply ang P57 million nga balor sang proyekto.
Suno sa Second Engineering District sang Department of Public Works and Highways Region 6, ang rason sang delay sa pag-ubra sang taytay amo ang panahon kag right of way.
