ILOILO CITY – Madamo ang ginplastar nga rason sang Second Engineering District sang Department of Public Works and Highways Region 6 sa tuman ka atrasado nga pagkay-o sang Monfort Bridge sa Dingle, Iloilo.
Sa interview sang Bombo Radyo kay Engr. Edward Oren, officer in charge sang Office of the Assistant District Engineer, iya ginpahayag nga subong nga bulan sang Marso, nagpasa sang position letter kag appeal sang suspension order ang A.D. Pendon Construction and Supply bangud sang tatlo ka mga rason.
Suno kay Oren, ginrason sang contractor ang atrasado nga pag-relocate sang Pototan-Dingle Water District sang ila water pipeline nga nahamtang sa lugar, ang isyu sa right of way bangud nga private property ang palibot sang suba rason nga may negosasyon pa nga natabo, kag ang malain nga tyempo.
Dugang pa niya, nagpasa man sang catch-up plan ang contractor kag nagpasalig nga padasigon ang pag-ubra sang taytay.
Ginpahayag dugang sang natungdan nga sang Nobyembre sang nagligad nga tuig, nag-issue na sang notice ang ahensya sa contractor nga may 6.72 percent nga negative slippage kag sang Enero subong nga tuig, liwat nga nag-issue sang notice ang ahensya bangud nga nagdangat na sa 23.45 percent ang slippage.
Nahibaluan nga sang naguba ang taytay bangud sang Bagyo Agaton sang nagligad nga tuig, nag-allocate sang P57.020 million nga budget ang Department of Public Works and Highways apang makaligad ang pila ka bulan, samtang nga ginakay-o ini, naguba nagid ang taytay kasunod sang paglaslas sang Bagyo Paeng.
Bangud sini, gindugangan ang budget nga nagdangat sa P57.89 million.
Ang una nga contract duration nga 205 calendars, ginpalawig pa tubtob sa 234 days.
Septyembre 28, 2022 sang gin-award sa A.D. Pendon Construction and Supply, Inc. ang proyekto kag magatakup kuntani sa May 19, 2023.
Apang bangud sa appeal sang contractor bangud sa problema sa panahon, ginpalawig pagid ini tubtob sa July 19 subong nga tuig.
Ang atrasado nga pagkay-o sang taytay ang nagresulta sang dako nga hu-ol sa mga pumuluyo.
Nagasakay nalang sila sa balsa agud nga makatabok.
