ILOILO CITY – Natalana nga pang-utdon ang 26 ka mga kahoy sa sulod sang Jaro Plaza bilang kabahin sang rehabilitasyon sang plaza.
Ini matapos nga na-aprubahan na sang Iloilo City Council ang Resolution of No Objection.
Sa 26 nga mga kahoy, 16 ang mahogany, pito ang gmelina, duha ang Indian tree, kag isa ka calachuchi, lunsay indi makabig nga ‘protected trees’.
Base sa ginpasar nga Resolution of No Objection, ang ugat sang sini nga mga kahoy ang ginakabalak-an nga maga-apekto sa sementado nga dalan sa plaza.
Delikado man ang bunga sang mga ini para sa mga nagatinir ukon nagalabay sa lugar.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang tagsa ka kahoy nga utdon ang islan man sang 10 ka seedlings nga itanom sang syudad.
Nahibaluan nga yara na sa 2nd phase ang syudad sa rehabilitation sang Jaro plaza.
Ini ang may budget nga P30.4 million kun sa diin, ginalakipan ini sang paghalin sang gym kag ang pagtinlo sang kanal.
