ILOILO CITY – Aprubado na sang Land Transportation Franchising and Regulatory Board ang ‘enhanced’ Local Public Transport Route Plan sang syudad sang Iloilo.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga nakabaton sila sang impormasyon nga napirmahan na ni Atty. Teofilo Guadiz III, chairman sang Land Transportation Franchising and Regulatory Board ang transport route plan sang syudad apang wala pa ang official transmittal sang mga dokumento sa Land Transportation Franchising and Regulatory Board- Region VI.
Suno kay Conlu, sa tion nga mag-abot na ang pirmado nga plano, ihatag ini sang Land Transportation Franchising and Regulatory Board- Region VI kay Iloilo City Mayor Jerry Treñas kag i-refer sa Iloilo City Council agud nga ma-amyendaran ang una nga Local Public Transport Route Plan.
Pahayag sang natungdan, sa ‘enhanced’ nga plano, may gindugang nga mga ruta kag may ginliwat apang indi tuman ka damo.
Dugang pa ni Conlu, ini na ang resulta sang ginpatigayon nga public consultation sang syudad matapos nga gin-ulan sang pagpakamalaot ang pagpatuman sini sang Hunyo 2022.
