ILOILO CITY – Isa lamang sa siyam ka mga nagabaligya sang uniforms kag paraphernalia sang Philippine National Police kag Philippine Army sa syudad kag probinsya sang Iloilo ang otorisado nga magbaligya.
Ini ang resulta sang ginpatigayon nga inspection sang Police Regional Office VI sa mga balaligyaan matapos ang natabo nga mga krimen kun sa diin, ang mga suspek ang nagasuksok sang uniporme sang law enforcement agencies.
Sa interview sang Bombo Radyo kay Police Brigadier General Leo Francisco, director sang Police Regional Office VI, iya ginpahayag nga ginpanugyanan na ang mga tag-iya sang mga balaligyaan nga indi sila otorisado kag dapat nga magkuha anay sang authority kag magsunod sa proseso.
Dugang pa niya, balikan sang inspection team ang ini nga mga stalls kag chekyaron kun bala, compliant na ang mga ini.
Ang ini nga data ang posible nga maglain pa bangud nga regionwide ang ginpatigayon nga inspection.
Sa interview naman sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga bisan ang mga himata sang mga pulis ang mahimo nga magbakal sang uniporme sa mga stalls bangud nga wala man sang total ban.
Apang suno sa iya, sa tion nga magduda na ang mga manugbaligya, mahimo sila nga magpangayo sang identification documents halin sa manugbakal.
