ILOILO CITY – Gin-contempt sang House agriculture and food panel ang duha ka mga opisyal sang cold storage company bangud sa gina-alegar nga pagpamatuk sa pagturn-over sang mga dokumento may kaangtanan sa ila kliyente sa ginpatigayon nga congressional probe sa pagtimbuok sang presyo sang bombay sang ulihi nga quarter sang 2022.
Sanday Super 5 officials George Ong kag Michael King Ang ang i-detain sa House of Representatives sa sulod sang 10 ka adlaw.
Nagtinguha nga mag-appeal sanday Ong kag Ang pinaagi sa pagpasalig sa komitiba nga magasunod sila sa request sang committee nga detalyado nga listahan sang mga kliyente kag inventory kag ipasa sa masunod nga public hearing apang wala sila ginpasugtan.
Suno kay Quezon Representative Jay-jay Suarez, ang iban nga mga cold storage facilities sa hearing ang nakapasa sang mga dokumento nga ginpangayo sang komitiba.
Ang motion ni Suarez nga i-contempt ang Super 5 officials ang nakakuha sang 30 ka mga boto gani, nagmandu si House agriculture and food panel chairperson Mark Enverga sang Quezon sa House’s Sergeant at Arms nga dal-on sa ila detention sanday Ong kag Ang.
