ILOILO CITY – May ginasundan na nga motibo ang Tigbauan Municipal Police Station may kaangtanan sa nasapwan nga bangkay sa talamnan malapit sa dalan Brgy. Linobayan, Tigbauan, Iloilo.
Ang lalaki nga ginapatihan biktima sang summary execution ang ginkilala kay Allen Sanchez, 58, residente sang Zone 5, Barangay Sto. Niño Norte, Arevalo, Iloilo City, base sa identification card nga nakuha sa bag sini.
Nasapwan ini nga may duct tape sa bibig, nakabaklid ang kamot, kag may pilas sa ulo.
Sa interview sang Bombo Radyo kay PCpt. Mary Jane Panes, hepe sang Tigbauan Municipal Police Station, iya ginpahayag indi pa masapubliko sa subong ang motibo bangud padayon pa ang imbestigasyon.
Suno kay Panes, may nabatian nga lupok kagab-i ang mga pumuluyo sa lugar apang gina-verify pa ini sang kapulisan.
Indi pa matumod kun sa lugar mismo ginpatay ang biktima ukon ginhal-id lang.
Wala sang may nakita nga empty shell kag wala sang senyales nga may dinumugay pa nga natabo sa lugar.
Wala man sang criminal record sa banwa sang Tigbauan ang biktima.
