ILOILO CITY – Ginalantaw nga may kaangtanan sa iligal nga droga ang kamatayon sang isa ka lalaki nga nasapwan sa talamnan malapit sa dalan sa Brgy. Linobayan, Tigbauan, Iloilo.
Ang lalaki nga ginapatihan biktima sang summary execution ang ginkilala kay Allen Sanchez, 58, nagadayon sa Zone 5, Barangay Sto. Niño Norte, Arevalo, Iloilo City kag wala pa nahibaluan ang permanente sini nga address.
Nasapwan ini nga may duct tape sa bibig, nakabaklid ang kamot, kag may pilas sa ulo kag abaga.
Sa interview sang Bombo Radyo kay Police Captain Mary Jane Panes, hepe sang Tigbauan Municipal Police Station, iya ginpahayag nga may nakita nga iligal nga droga sa kagamitan sang biktima base sa crime scene investigation sang Scene of Crime Operations team.
Suno kay Panes, ang biktima ang may record man sa pagpangawat nga nahimo sa syudad sang Iloilo.
Naka-agi man ini preso sa Bureau of Jail Management and Penology- Iloilo District Jail Facility sa Barangay Nanga, Pototan kag sa Iloilo City District Jail sa Barangay Ungka, Jaro bangud sa kaso nga theft.
Gina-imbestigaran pa sang Tigbauan Municipal Police Station kun sa lugar siya ginpatay ukon ginhal-id lamang.
Nagpanawagan naman ang kapulisan sa nakakilala ukon sa pamilya sang biktima nga magpadulong lang sa punerarya sa banwa sang Tigbauan ukon magpakig-angut sa Tigbauan Municipal Police Station.
