Tigbauan, Iloilo – Wala pa sa gihapon sang himata nga nag-claim sa lalaki nga ginapatihan biktima sang summary execution sa Barangay Linobayan, Tigbauan Iloilo.
Ang biktima amo si Allen Sanchez, 58, kag residente sang Zone 5, Barangay Sto. Niño Norte, Arevalo, Iloilo City.
Sa interview sang Bombo Radyo kay Police Colonel Ronaldo Palomo, iya ginpahayag nga ginahulat nalang ang himata sang biktima antes umpisahan ang autopsy.
Suno kay Palomo, wala ini nagapati nga may yara sang vigilante group sa probinsya sang Iloilo nga naangot sa pagpatay kay Sanchez.
Matandaan nga nasapwan ang biktima nga nakabaklid sa talamnan kag may yara sang duct tape ang bibig kag nakagapos ang kamot.
Nahibaluan nga nakaagi na preso si Sanchez sa Bureau of Jail Management and Penology- Iloilo District Jail Facility sa Barangay Nanga, Pototan kag sa Iloilo City District Jail sa Barangay Ungka, Jaro bangud sa kaso nga pagpangawat.
Samtang, nagapadayon ang otoridad sa pagtumod sa motibo sang krimen.
