Nagsaka sa ika-49 nga pwesto ang Philippine women’s football team sandig sa pinakaulihi nga women’s world rankings nga ginpaguwa sang FIFA.
Apat ka halintang ang gintaklad sang Filipinas nga yara anay sa ika-53 sa female ranking sa bug-os nga kalibutan.
Ini na ang pinakamataas nga pwesto nga nakuha sa maragtas sang team nga ginabug-usan sang dalayawon nga mga players kaangay kanday Hali Long, Inna Palacios, Quinley Quezada, Tahnai Annis kag Olivia Davies-McDaniel.
Ginkilala man ini sang Philippine Football Federation bilang isa ka historic achievement nga bunga sang kolaborasyon sang federation, team management kag coaching staff, kag panikasog sang tanan nga players.
Suno naman sa Australian coach sang team nga si Alen Stajcic, pamatuod ini nga padulong sa husto nga direksyon ang team magluwas pa nga magahampang sila sa World Cup subong nga tuig nga labing-una man sa maragtas sang Pilipinas sa patag sang football.
Sang damlag lang, nakadangat ang Filipinas sa Pinatar Cup sa Espanya kun sa diin ila naatubang ang Iceland nga ika-16 sa ranking, Scotland nga ika-25, kag Wales nga ika-32.
Apisar nalutos ang team, nangin maayo ini nga exposure antes ang iban nga ginalauman nga international games.
Balantayan sa masunod nga bulan ang pagpasakop sang Filipinas sa Olympic qualifying tournament.
