ILOILO CITY – Naka-record sang pinakauna nga casualty ang probinsya sang Iloilo bangud sa rabies.
Sa interview sang Bombo Radyo kay Dr. Maria Socorro Colmenares – Quiñon, head sang Iloilo Provincial Health Office, iya ginpahayag nga ang napatay amo ang 27 anyos nga lalaki nagikan sa banwa sang Igbaras, Iloilo.
Suno kay Quiñon, nagalakat ang biktima sa esplanade sa banwa sang Guimbal, Iloilo sang ginkagat sang layaw nga ido.
Nakabatyag sang sintomas sang rabies ang biktima rason nga gindala sa Western Visayas Medical Center apang ginbawian sang kabuhi makaligad ang pila ka adlaw.
Kasunod sini, nagpangabay si Quiñon sa mga tag-iya sang ido nga mangin responsable pinaagi sa pagpabakuna sang ido kag pagbutang sa hawla ukon paghigot agud nga indi mangin layaw.
