Performer slash fangirl ang Filipino-British singer-songwriter nga si Beatrice Kristi Laus ukon mas kilala nga beabadoobee sang nag-upod ini sa second show ni Taylor Swift sa Las Vegas.
Gin-share sang Ilongga singer ang iya clips kag pictures sa “Eras” concert kun sa diin siya ang nagkanta kag nag-play sang guitar sa opening act.
Ginpahayag sini nga indi pa sya gihapon maka-recover nga makaupod ang 33-anyos nga Shake It Off icon nga iya gintawag nga queen.
“I will never recover from this. 2nd Vegas show tn w the queen herself @taylorswift,” caption sini sa iya Instagram post.
Nabun-ag sa Iloilo City si beabadoobee kag nagsaylo sa London ang pamilya sang siya ang naga-edad sang tatlo ka tuig.
Kilala siya sa iya debut studio album nga “Fake It Flower” nga ginpaguwa sang 2020, kag second album “Beatopia” sang 2022.
Magluwas sa Las Vegas, yara man si beabadoobee sa show ni Taylor sa Arlington, Texas; Tampa, Florida; Houston; kag Atlanta.
Natalana pa nga ianunsyo kun may Asian stops para sa “Eras” tour ni Taylor. ##
