ILOILO CITY – Nakuhaan sang P8.1 million nga balor sang iligal nga droga ang isa ka babayi sa ginpatigayon nga drug buybust operation sang Regional Police Drug Enforcement Unit VI, Jaro Police Station sa Zone 6, Barangay Buhang, Jaro Iloilo City.
Ang main subject amo si Estrelita Bueno, alias “Madam Ester”, 68, residente sang Abbey Road Bagbag Sauyo, Novaliches, Quezon City.
Arestado man si Noe Llagas, alias “JR”, 27, residente sang Barangay Ungka, Jaro, loilo City.
Nakuha sa duha ang ginabanta 1, 200 grams sang shabu nga may standard drug price nga Php 8, 160, 000.00.
Sa interview sang Bombo Radyo kay Bueno, iya ginpahayag nga isa ka babayi ang nagsugo sa iya nga dal-on ang bag sa Iloilo City kag may mabaton nga isa ka lalaki.
Gintuman lang niya ang sugo sa iya bangud nga may bayad.
Suno pa sa natungdan, wala man ini nakahibalo nga iligal nga droga ang unod sang bag.
Dugang pa niya, nagsakay ini sa roll-on, roll-off kag nagdungka sa port sang Caticlan.
Ginpahayag man sang main subject nga naka-agi na ini gamit sang iligal nga droga.
Ang iligal nga droga ang ginsulod pa sa packaging sang powdered milk.
