ILOILO CITY – Nagdugang ang galastuhon sang mga mangunguma bangud sa tuman ka init nga tyempo.
Sa interview sang Bombo Radyo kay Mary Jean Amboy, manugtanum sang mais sa Alimodian, Iloilo, iya ginpahayag nga subong, nagabakal na sila sang gatung para sa pagpatubig sang ila maisan.
Suno sa iya, nagbakal pa sila sang dako nga water hose agud nga mapasaka ang tubig nagikan sa suba padulong sa ila nga mga tanom nga mais.
Sa isa ka bulan suno kay Amboy, nagadangat tubtob sa 24 ka litro sang gatung ang ila nga ginabakal, depende sa sitwasyon sang duta.
Dako gid nga problema suno sa natungdan ang kakulang sang tubig bangud naga-apekto ini sa kalidad sang bunga sini.
