ILOILO CITY – Napintahan na sang Iloilo City District Engineering Office sang Department of Public Works and Highways Region VI ang mga napanas na nga pedestrian lane sa palibot sang Jaro Plaza.
Ini matapos nga ginpa-Bombo ang mga panas nga pedestrian lane nga nagatuga sang kakulba sa mga nagatabuk sa dalan.
Sa interview sang Bombo Radyo kay Engr. Allan Salaver, chief sang maintenance section sang Iloilo City District Engineering Office, iya ginpahayag nga napintahan na sang thermoplastic paints ang faded nga mga pedestrian lanes.
Magluwas sa Jaro Plaza, ginpintahan man ang panas nga pedestrian lane sa El 98 Street, Jaro, Iloilo City.
Pintahan man ang mga faded pedestrian lanes sa iban pa nga distrito sang syudad.
Suno kay Salaver, sang nagligad lang nga duha ka semana nag-abot ang ila nga pinta rason nga gina-amat-amat lang ubra.
Dugang pa niya, sang nagligad lang nga tuig nag-abot ang ila nga augmentation fund nga amo ang rason sang atrasado nga pag-order sang pinta.
Ang thermoplastic paint ang nagadugay sang tubtob isa ka tuig sa kondisyon nga maayo lang ang pag-apply.
