ILOILO CITY – Indi na bag-o ang istilo sang senior citizen nga drug courier nga nagdala sang P8.1 million nga balor sang iligal nga droga sa Iloilo.
Sang Lunes, arestado si Estrelita Bueno, alias “Madam Ester”, 68, residente sang Abbey Road Bagbag Sauyo, Novaliches, Quezon City bangud sang pagdala sang droga sa syudad nagikan sa Luzon.
Arestado man si Noe Llagas, alias “JR”, 27, residente sang Barangay Ungka, Jaro, loilo City nga amo ang magabaton kuntani sang droga suno sa kapulisan.
Sa interview sang Bombo Radyo kay Police Colonel Joeresty Coronica, director sang Iloilo City Police Office, iya ginpahayag nga sang nagligad nga anum ka bulan, nadakpan man ang duha ka mga personalidad nga nagdala sang droga sa Negros Occidental nagikan sa Luzon.
Kaangay ni Bueno, nagsakay man ang mga ini sa roll on-roll off vessel kag nagsakay sa bus.
Ginbutang man ang droga sa suludlan sang powdered milk.
Suno kay Coronica, posible nga si Bueno na ang nagbulos sa duha ka mga nadakpan.
Pahayag dugang sang natungdan, ang iban nga mga drug couriers ang nagapangita man sang iban nga istilo agud indi madali nga madakpan sang otoridad.
Samtang, ginpahayag ni Coronica nga indi tanan nga mga bagahe ang ma-inspect sang canine dogs kaangay sang dalagko nga truck van.
Ang mga canine dogs suno sa natungdan ang may yara lang sang nagaka-igo nga tion nga mangin effective.
Kasunod sini, nagpasalig ang opisyal nga magapatigayon sila sang regular nga inspection sa mga ports, padamu-on pa ang canine dogs kun may resources kag pabaskugon pa ang intelligence operations.
