ILOILO CITY – Bali ang duha ka tiil sang 19 anyos nga lalaki matapos nasaga-iran sang tricycle sa Barangay Zona Sur, Banate, Iloilo.
Ang biktima amo si Mark June Dedit, residente sang Barangay Alacaygan, Banate, Iloilo.
Samtang, ang driver sang tricycle amo si Kirsten Siva, 39, residente sang Barangay Juanico, Banate, Iloilo.
Sa interview sang Bombo Radyo kay Police Master Sergeant Hezron Baterbonia, chief investigator sang Banate Municipal Police Station, iya ginpahayag nga nagalakat pauli ang biktima upod sa iya nobya sang nasag-iran sang tricycle.
Halin sa iya trabaho si Siva sa banwa sang Anilao kag ginapatihan nga yara sa impluwensya sang makahulubog nga ilimnon.
Pahayag dugang ni Baterbonia, tuman ka silaw sang suga sang salakyan nga nasumalang ni Siva rason nga nga nagpahigad ini apang wala niya nakita ang magnobyahanay nga nagalakat kag nalab-ot gid niya ini.
Nagdasok pa ang biktima sa side car sang trcicyle rason nga na-fructure gid ang mga tiil sini.
Sa subong, padayon pa nga ginabulong ang biktima sa Western Visayas Medical Center kag natalana nga operahan ang ulo kag mga tiil sini.
