Patay ang magpakaisa nga lalaki matapos ginluthang sang riding-in-tandem suspects sa Zone 1, Barangay Baldoza, La Paz, Iloilo City kaina sang kaagahon.
Ang mga biktima amo sanday Jomar Mendoza, ginapahayag nga residente sang San Nicolas, La Paz; kag Edmund Mendoza alias Turling, 32, residente sang Baldoza, La Paz.
Ginabanta nga masobra 10 ka basiyo sang 45 caliber pistol ang nakit-an sa crime scene.
Sa inisyal nga impormasyon, nagapangape lamang ang duha kag naga-istoryanay sa higad sang dalan sang nag-abot ang suspects.
Sa interview sang Bombo Radyo kay Barangay Kagawad Jerry Dumlao, iya ginpahayag nga naka-istoryahanay pa ang suspects kag ang mga biktima antes ang pagluthang.
Ginbalikan pa suno sa natungdan si Alias Turling agud nga i-finishing.
Suno kay Dumlao, nakaagi nga nadakpan sa drug buy bust operation si Edmund Mendoza sang una. Sa subong, wala na sa listahan sang drug personalities si Edmund suno sa kagawad kag naga-obra na sa bugasan.
Sa interview naman sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga sa inisyal nga impormasyon, may armas nga na-recover halin sa hawak ni Alias Turling.
Sa inisyal nga pagpakig-angot ni Sangrines sa iloy sang biktima, daku ang posibilidad nga kilala sini ang ginaduha-duhaan nga mga suspects. ##
