ILOILO CITY – Madamo ang criminal records sang magpakaisa nga ginluthang sa Barangay Baldoza, La Paz, Iloilo City.
Ang mga biktima amo ang magpakaisa nga sanday Jomar Mendoza, ginapahayag nga residente sang San Nicolas, La Paz; kag Edmund Mendoza alias Turling, 32, residente sang nasambit nga lugar.
Sa interview sang Bombo Radyo kay Police Captain Johna Aguil, hepe sang La Paz Police Station, iya ginpahayag nga si Edmund alias Turling ang may record nga violation sa Republic Act 9165 ukon ang Comprehensive Dangerous Drugs Act of 2002, robbery, frustrated homicide, illegal possession of deadly weapons, Republic Act 4136 ukon ang Land Transportation and Traffic Code, alarm and scandal kag physical injuries.
Si Jomar Mendoza naman ang may kaso nga paglapas sa Republic Act 9165 ukon ang Comprehensive Dangerous Drugs Act of 2002 kag unjust vexation.
Ang ini nga mga kaso ang nakomiter humalin pa sang 2011.
Samtang, na-recover naman sa bulsa ni Mendoza ang apat ka sachet sang suspected shabu.
Na-recover man sa lugar ang 12 ka fired cartridge kag apat ka deformed slug.
May na-recover man nga airsoft pistol sa crime scene.
Sa subong, padayon pa nga gina-imbestigaran sang kapulisan ang motibo sang krimen.
‘GINTOKHANG’
Yara na sa listahan sang Barangay Anti-Drug Abuse Council sang Barangay Baldoza, La Paz ang isa sa mga biktima sang pagkatiro kaina sang kaagahon.
Ang mga biktima amo ang magpakaisa nga sanday Jomar Mendoza, ginapahayag nga residente sang San Nicolas, La Paz; kag Edmund Mendoza alias Turling, 32, residente sang nasambit nga lugar.
Sa interview sang Bombo Radyo kay Barangay Kagawad Agustin Huesca, anay punong barangay sa lugar, iya ginpahayag nga si alias Turling upod sa iya amay ang ginpaidalom sa Tokhang.
Sa pagkamatuod suno kay Huesca, gindakup sang Philippine Drug Enforcement Agency si alias Turling bangud sa pag-intra sa illegal drug activity.
Antes ini nag-angkon sang live-in partner, naga-upod ini sa grupo sang mga kalalakinhan nga may background man sa iligal nga droga.
Apang, sang ulihi, wala na ini na-monitor bangud nga nagpadulong sa Metro Manila.
