ILOILO CITY – Ginpa-Bombo sang isa ka senior citizen ang duha ka mga babayi nga nagtunto sa iya.
Sa interview sang Bombo Radyo kay Amparo Librilla sang Barangay Cubay, Jaro, Iloilo City, iya ginpahayag nga nagpakunu-kuno nga nagabusong ang isa ka babayi kag nagtanyag sang kulintas sa iya.
Pahayag sang babayi, ginpabusong siya sang iya amo kag ginhambalan nga hatagan niya ini sang P80, 000 agud nga ipahulog ang bata.
Ginpilit pa ini nga papirmahon sang blangko nga papel.
Ginhatagan man ini sang kulintas nga mahimo nga mabaligya sang babayi agud nga matigayon ang abortion.
Wala nagpahulog ang babayi. Sa baylo, ginbaligyan niya sa balor nga P35, 000 ang kulintas agud nga may inugplete pauli sa Davao City.
Apang bangud nga wala sang nagaka-igo nga kwarta si Librilla, P9, 500 lamang ang iya ginhatag nga nagikan pa sa iya pension.
Sang nag-abot na ang iya mga apo, ginsugid niya nga nagbakal siya sang kulintas.
Sang ginpalantaw sang iya mga apo sa isa ka pawnshop, natukiban nga peke ang ginbakal niya nga alahas.
Suno kay Librilla, daw kaangay nga naganyat ini gilayon sang ginbaligyaan sang kulintas.
Pahayag pa niya, naluoy gid siya sa wala nakilala nga babayi bangud sa hitsura sini nga daw makaluluoy.
