Iloilo City – Narekord sang Committee on Public Safety ang 14,226 ka mga panimalay sa Iloilo City nga may illegal connection sang kuryente.
Sa interview sang Bombo Radyo kay Iloilo City Councilor Sedfrey Cabaluna, chairman sang komitiba, iya ginpahayag nga nagakinahanglan sang igtalupangod ang mga panimalay nga may yara sang illegal connection nga masami gintunaan sang sunog sa lugar.
Ini matapos ang nagluntad nga dako nga sunog sa Barangay West Habog-Habog kag San Juan, Molo nga nagtupok sang 300 ka mga panimalay sang Enero 28.
Sa numero nga ini, 114 ang may yara sang iligal nga koneksyon, kag 186 ang wala sang metro.
Samtang, nalakip man sa listahan ang nagluntad nga asud-asud nga sunog sa distrito sang Lapuz, Jaro kag Mandurriao nga nagtupok sang masobra 100 ka mga panimalay sang tinalikdan nga bulan.
Suno kay Cabaluna, indi bastante ang paghatag sang cash assistance kag relief operations sa mga nasunugan, sa baylo, mas nagakinahanglan sang pag-aligmat kag expertise agud malikawan ang kaangay nga insidente.
Nagpanawagan naman ang konsehal sa mga barangay officials nga kumbinsihon ang mga pumuluyo nga magkooperar agud masolusyunan ang iligal nga koneksyon kag fire hazards sa syudad.
Nagpasalig naman ang More Power ang Electric Coporation, Bureau of Fire Protection, City Disaster Risk Reduction Management Office, kag Office of the Building Official nga hatagan sa nagakaigo nga bulig ang mga pumuluyo sang syudad may kaangtanan sa illegal connection.
