Lauman ang pagsaka sa presyo sang bugas sa masunod nga mga semana bangud sa manubo nga buffer stock, mataas nga farmgate prices sang palay kag nagasaka nga presyo sang imported rice.
Suno kay Department of Agriculture Assistant Secretary kag deputy spokesman Rex Estoperez, gina-project sang ahensya nga magadangat tubtub sa P5 per kilo ang isaka sa presyo sang bugas.
Sa harvest season, gin-cite sang opisyal ang mataas nga presyo sang rice procurement nga yara sa P22 tubtub sa P23 kada kilo.
Ginpaathag ni Estoperez nga kun nagataas ang procurement price,buot silingon, magataas man ang market price; kun magsaka ang farmgate price, magasaka man ang market price.
Ang isa pa ka naga-epekto sa retail price sang bugas amo ang rice inventory subong sang pungsod nga naga-cover lamang sang 51 ka adlaw nga mas manubo ipaanggid sa kinaandan nga 90-day buffer agud ma-cover ang private kag government inventories.
Gindugang pa ni Estoperez nga indi lang Pilipinas ang nagabatyag sini subong bangud may price increase man sa bugas mangin sa iban nga mga pungsod bangud apektado sang Ukraine-Russia war ang presyo sang inputs. ##
