ILOILO CITY – Gindayaw sang mga otoridad ang isa ka South African pilot nga nagpatigayon sang emergency landing apisar nga nagkamang sa iya pulungkuan ang makamandag ukon dalitan nga man-og bangud sang pagpakita sini sang indi basta-basta nga kaisog.
Suno sa report, si Rudolf Erasmus ang nagadala sang isa ka gamay nga private aircraft nga may apat ka mga pasahero nagikan sa Bloemfontein padulong sa Pretoria sang nabatyagan sini ang isa ka dako nga Cape Cobra nga nagakamang sa iya likod.
Apisar sang tuman ka dako nga pressure, napahugpa sini ang eroplano nga wala sang may natabo nga insidente.
Suno kay Erasmus, nabatyagan niya ang man-og sa tunga-tunga pa lamang sang flight matapos ang malamig nga butang nga nagdapat sa iya likod.
Ang mga Cape cobras ang makita sa southwestern South Africa kag may makamamatay nga kamandag nga nagakinahanglan sang gilayon nga treatment sang anti-venom.
