ILOILO CITY – Patay ang isa nga lalaki matapos ginluthang sa Brgy. Panalian, Maasin, Iloilo.
Ang biktima amo si Gilbert Constantino, 35 mangunguma samtang ang suspek naman amo si Rodel Nepomuceno, 27, active auxiliary member sang Citizen Armed Force Geographical Unit (CAFGU), lunsay residente sang nasambit nga barangay.
Sa interview sang Bombo Radyo kay Police Capt. Jayson Mausig, Officer-in-Charge sang Maasin Municipal Police Station, iya ginpahayag nga nagpanghangkat sang away ang biktima matapos nga wala ginpa-utang sang suspek.
Suno kay Mausig, may tyangge ang suspek kag mautang kuntani ang biktima.
Diri kag nagsupot ang kaakig sang biktima tubtub ginsulong niya ang suspek sa iya balay.
May dala nga binangon ang biktima kag bangud sa kahadlok, ginluthang ini sang suspek gamit ang 20 gauge shot gun sa dughan.
Nagdalagan pa ang biktima, apang ginlagas pa ini sang suspek kag ginluthang sa ulo.
Gindala pa sa ospital ang biktima, apang gindeklarar nga dead on arrival.
Sa subong, preso na ang suspek sa Maasin Municipal Police Station kag natalana nga pasakaan sang kaso nga homicide.
