Nangin unified super bantamweight champion ang Pinoy boxer nga si Marlon Tapales matapos ginlutos si Murodjon Akhmadaliev sang Uzbekistan sa sambuwa sa San Antonio, Texas.
Nakuha sang 31-anyos nga boksidor ang World Boxing Association kag International Boxing Federation world super bantamweight belts paagi sa split decision kun sa diin duha ka judges ang nag-skor pabor sa iya, 115-113, samtang ang isa naman ka judge ang nag-skor sang 118-110 pabor sa iya kasumpong.
Si Tapales nga tumandok sang Lanao del Norte amo subong ang ikaduha nga active Filipino boxer nga makabig nga world champion matapos naagaw man ni Melvin Jerusalem ang World Boxing Organization minimumweight belt tatlo ka bulan na ang nagligad sa sambuwa sa Japan.
Indi man haluson makapati si Tapales sa naangkon nga upset victory bangud ginakabig siya nga heavy underdog sa iya Uzbek nga kasumpong nga subong may isa pa lang ka kalutusan sa iya nga pro career sa boxing.
Kasunod sini, makaatubang ni Tapales kun sin-o man nga magadaog sa away sa tunga nanday Stephen Fulton kag Japanese superstar Naoya Inoue nga naka-schedule sa Hulyo 25 sa Tokyo, Japan.
