Pinasahi ang kaso sang isa ka labrador sa United Kingdom nga amo subong ang ginakilala bilang pinaka-una nga ido nga nabulong ang adiksyon sa makahulubog nga ilimnon.
Naga-edad sang duha ka tuig ang labrador nga si Coco sang na-rescue ini kaupod ang isa pa ka ido bangud nagtaliwan na ang ila tag-iya.
Sunod nga gindala si Coco kag ang kaupod sini sa Woodside Animal Welfare Trust sa Plymouth, Devon apang wala sang ideya ang staff kun ano ang problema sang duha ka canines.
Ulihi na natalupangdan nga adik gali sa alcohol ang duha ka ido bangud sa sulod sang malawig nga tinuig, nangin batasan sang ila tag-iya nga ibilin ang botelya sang ilimnon sa guwa sang ila nga balay nga amo naman ang ginbulos kag gin-enjoy sang mga ido.
Tuman ang pagka-adik sang duha ka ido sa ilimnon rason nga napatay man ang kaupod ni Coco sang tion nga wala na ini naka-inom sang alcohol, samtang gingamitan naman si Coco sang sedative drug sa sulod sang isa ka bulan agud nga mapakalma.
Suno sa dog shelter, amat-amat na subong nga nagabalik sa normal ang paghulag ni Coco apang indi pa ini handa sa adoption bangud kun kaisa, makit-an pa ang pagsala-sala sini.
Nalipay man ang Woodside Animal Welfare Trust nga matapos ang sinemana nga pagtatap kay Coco, malapit na lang ini nga maka-recover sa pinasahi nga canine alcohol addiction kag malapit na lang ma-adopt kag makaangkon sang panibag-o nga tag-iya nga magapalangga sa iya. ##
