ILOILO CITY – Sang nagtimbuok ang kaso sang Coronavirus Disease 2019, madamo sang gin-quarantine.
Ang kadam-an ang halos indi mahamtang samtang nga gina-isolate.
Apang paano kun 500 ka adlaw ang quarantine period, masarangan mo ayhan?
Sa Spain, isa ka 50-year-old Spanish mountain climber ang naggwa sa isa ka underground nga kweba kun sa diin, isa ka tuig kag tunga ini nga nag-isolate bilang kabahin sang eksperimento sa epekto sang isolation sa lawas sang tawo.
Suno kay Beatriz Flamini, sa sulod sang malawig nga tion, kaugalingon lamang niya ang iya nga na-istorya.
Ginsuguran ni Flamini ang challenge sang November 21, 2021– antes ang pagsakup sang Russia sa Ukraine kag samtang ang bilog nga kalibutan ang naga-antos sa pandemya.
Nagpabilin siya 70 meters (230 feet) underground, magluwas lamang sa isa ka semana kun sa diin, napilitan ini nga magbiya sa kweba bangud sa natabo nga problema sa internet router kag kinahanglan niya ang bulig.
Samtang nga yara ini sa sulod sang kweba, nagabasa lamang siya sa bulig sang artificial lights, naga-exercise man siya kag naga-bag crochet stitching.
Apang, gina-monitor man siya sang technical team nga amo ang nagabilin sang pagkaon sa exchange point sa kweba.
Ini naman ang ginakabig sang iban nga “extreme endurance test”.
Suno kay Flamini, isa sa pinakamabudlay nga tion sa sulod sang kweba ang natabo sang nagsulod ang madamo nga langaw.
Apang, indi kaangay sang iban, si Flamini ang wala gid nagbiya sa kweba.
