Napaslawan ang Filipino boxer nga si Rene Marck Cuarto nga mangin world champion matapos ginlutos sang Japanese nga kasumpong sa interim International Boxing Federation minimumweight title fight sa Tokyo, Japan.
Tatlo ka beses nga natumba ang Pinoy boxer sa kamot ni undefeated boxer Ginjiro Shigeoka lakip na ang duha ka beses sa decisive round.
Sa una nga bahin sang hampang napatumba pa sang 26-anyos Pinoy boxer ang Japanese boxer gamit ang iya nga right straight.
Apang nakabangon ang 23-anyos nga Japanese southpaw boxer kag ini ang nakakuha sang belt.
Si Cuarto amo man anay ang naga-uyat sang International Boxing Federation minimumweight strap kag may yara subong sang 21-4-2 nga rekord nga may 12 knockouts.
Si Shigeoka naman ang nagapabilin nga undefeated nga may siyam ka daog lakip na ang pito ka knockouts.
