ILOILO CITY – Maga-file sang motion for reconsideration ang Iloilo City Legal Office sa desisyon sang Court of Appeals nga nagabalik sa empleyado sang Iloilo City Hall nga una nga gin-dismiss bangud sa electioneering.
Sa desisyon sang 19th Division sang Court of Appeals, ginamanduan si Iloilo City Mayor Jerry Treñas nga pabalikon si Rosita Camacho bilang Special Operations Officer III sang Office of the Barangay Affairs bangud nga premature ang dismissal nga ginpagwa sang alkalde sa rason nga wala pa sang pinal nga desisyon ang Civil Service Commission may kaangtanan sa appeal sang akusado.
Ginamanduan man si Treñas nga bayaran sang syudad ang backwages kag iban pa nga benepisyo ni Camacho humalin sang Hunyo 30, 2021 tubtob nga makabalik siya sa pwesto.
Sa interview sang Bombo Radyo kay Treñas, iya ginpahayag nga indi niya maintindihan ang nakabutang sa desisyon sang Court of Appeals kun sa diin, ang dismissal ang dapat nga aprubado sang head sang ahensya.
Apang suno sa alkalde, wala man sang head nga mas mataas pa sa posisyon niya.
Dugang pa sang alkalde, posible nga na-mislook lang sang Court of Appeals ang amo nga kaso.
Samtang, ginatun-an pa sang syudad ang pagbayad kay Camacho sang nga backwages kag iban nga benepisyo.
Kung madumduman, si Camacho ang gin-dismiss bangud ginapahayag nga nagsugo sa pila ka mga job hires sa syudad nga magtakud sang campaign poster ni anay Mayor Jose Espinosa III nga bilas sang alkalde kag nakasumpong sa mayoralty race sang 2019.
