ILOILO CITY – Indi na mandatory ang pagsuksok sang face mask kag observance sang physical distancing sa full in-person graduation ceremony sa idalom sang Department of Education.
Ini ang base sa ginpagwa nga Department of Education Order No. 9 series of 2023.
Sa interview sang Bombo Radyo kay Dr. Ramir Uytico, director sang Department of Education Region VI, iya ginpahayag nga nakadepende ini sa gihapon sa venue.
Suno sa iya, mahimo ini nga mapatuman kun ang venue sang graduation rites ang yara sa open gym ukon sa lugar nga may maayo nga ventilation.
Dugang pa niya, nakadepende naman sa mga eskwelahan kun may numero lamang sila sang atendees nga pahanugutan nga magsulod sa venue.
Ang graduation rites ang dapat nga hiwaton sa tunga sang Hulyo 10 kag Hulyo 14.
Nahibaluan nga sang nagligad nga tuig, face-to-face naman ang graduation ceremony apang strikto nga ginpatuman ang physical distancing kag pagsuksok sang face mask.
Ginlimitahan man ang numero sang tumalambong kag mangin ang mga aktibidad nga kabahin sang seremonya.
