ILOILO CITY – Ginklaro sang Iloilo Police Provincial Office nga wala sang kaangtanan ang pila ka serye sang killings sa probinsya sang Iloilo subong nga tuig.
Kun balik-balikan, ang Pebrero 27, patay sanday Michael Quizon, 31, residente sang Barangay Ticud, Lapaz, Iloilo City, kag Kenneth Limbaco, 25, residente sang Barangay Desamparados, Jaro, Iloilo City matapos gintiro sang wala pa nakilala nga suspect sa Barangay Jibao-an, Pavia, Iloilo.
Iligal nga droga ang ginalantaw nga motibo sang krimen.
Marso 23 sang nasapwan nga wala na sang kabuhi si Allen Sanchez, 58, residente sang Zone 5, Barangay Sto. Niño Norte, Arevalo, Iloilo City sa isa ka talamnan sa Barangay Linobayan, Tigbauan, Iloilo.
Sa imbestigasyon sang kapulisan, iligal man nga droga ang motibo.
Marso 26, maswerte nga wala napatay ang isa ka ex-convict nga si Glen Paloma, residente sang Barangay Zamora-Melleza, Iloilo City Proper nga ginhal-id sa Barangay Calaboa, Leganes.
Lakip sanday Police Executive Master Sergeant Jessie Jim Rubio kag Police Staff Sergeant Enrico Carlito Gonzales sa anum ka mga suspects nga ginpasakaan sang kaso sang Iloilo Police Provincial Office.
Ang motibo sang krimen, nasal-an lamang nga makawat ang biktima.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga wala sang ebidensya nga maka-angut sa mga krimen.
Sa mga krimen nga natabo sa Leganes kag Tigbauan, may mga impormasyon nga nagaguluwa nga mag-abyanay ang duha.
Suno kay Araño, sa impormasyon nga ila nakuha, nagkilalahay ang duha sa sulod sang Bureau of Jail Management and Penology apang wala pa sang direkta nga ebidensya nga may kaangtanan ang duha ka krimen.
Padayon naman ang imbestigasyon sang Iloilo Police Provincial Office sa mga kaso nga wala pa nasolbar.
