Ginkilala ang Sacramento Kings head coach nga si Mike Brown bilang 2022-2023 National Basketball Association Coach of the Year.
Ginlutos sang 53-anyos nga head coach ang coaches sang Boston Celtics kag Oklahoma City Thunder; kag siya man ang labing-una nga unanimous winner sang amo nga award matapos ginpabalik ang Kings sa playoffs.
Nadag-an man sini ang kaangay nga award sang 2009 sang yara pa ini sa Cleveland Cavaliers kag sang si LeBron James pa ang ginkilala nga Most Valuable Player sa liga.
Nakaagi man ini sa Los Angeles Lakers pagkatapos sa Cleveland.
Pinakadaku sini nga hinimuan sa Kings nga mapabalik ang team sa playoffs matapos ang 17 ka tuig nga amo man ang pinakamalawig sa maragtas sang liga kag pinakamalawig man nga active drought sa major US pro sports.
Nahibaluan nga 2005-2006 season pa sang ulihi nga nakapakita ang Sacramento sa playoffs.
Sa subong abanse na ang Kings, 2-0, sa first-round playoff series batok sa reigning champion nga Warriors matapos nadag-an ang duha ka una nga hampang.
