ILOILO CITY – Nakahanda na ang Muslim community sa syudad kag probinsya sang Iloilo para sa Eid’l Fitr ukon ang the Feast of Breaking the Fast bwas nga adlaw, Abril 22.
Sa interview sang Bombo Radyo kay Mohammad Anir sang Muslim Compound sa Zone 3, Barangay San Isidro, La Paz, iya ginpahayag nga naihaw na ang isa ka baka kahapon apang, wala nakita ang mooncrescent sa ginpatigayon nga moonsighting.
May dugang pa nga baka nga ilihawon suno sa natungdan nga amo ang saluhan sang Muslim community bwas nga adlaw, sa adlaw mismo sang Eid’l Fitr.
Sa syudad kag probinsya sang Iloilo, may yara sang linibo ka mga Muslim nga nagapuyo.
Una na nga gindeklara sang Malacañang nga holiday subong nga adlaw, Abril 21 bilang pagdumdom sa Eid’l Fitr.
Ang sighting sang mooncrescent ang importante sa pagtumod sang Eid’l Fitr bangud nga ini ang nagamarka sang pagsugod sang bag-o nga lunar month sang Shawwal, ang ika-pulo nga bulan sa Islamic lunar calendar.
Ang Eid’l Fitr ang isa ka dako nga Islamic festivity bangud nga ini ang nagamarka sang katapusan sang Ramadan — ang bulan sang fasting nga nagsugod sang Marso 23.
