ILOILO CITY- Nakuhaan sang malapit tunga sa milyon ka pesos nga balor sang iligal nga druga ang subject sang search warrant sa Pavia,Iloilo.
Ini amo si Neil Solen,36-anyos, residente sang Purok 4,Cabugao Norte, Pavia kun sa diin man ginserbe ang search warrant.
Sa interview sang Bombo Radyo kay PMaj Dadje Delima, hepe sang Pavia Municipal Police Station, iya ginpahayag nga sang nagapalapit na ang otoridad sa balay ni Solen, nakamutik ang subject paagi sa closed circuit televesion sa balay sini rason nga nakadalagan pa ini upod sa duha ka iban pa.
Natigayon nga madakpan si Solen kag nakapalagyo naman ang duha niya ka kaupdanan,kalakip diri ang iya live-in partner.
Suno kay Delima, siyam ka tuig na nga naga-engage sa iligal nga druga si Solen kag ginakabig nga high- value individual.
Narekober sa iya ang 10 ka bulto sang iligal nga druga nga may standard drug price nga P400,000.
Magluwas sa druga, nakuha man sa sulod sang iya balay ang isa ka pusil kag isa ka granada.
Magapangatubang si Solen sang kaso nga paglapas sa Comprehensive Dangerous Drugs Act of 2002 bangud sa paghupot sang iligal nga druga, paglapas sa Republic Act No. 9516 bangud sa paghupot sang granada, kag paglapas sa Republic Act 10591 bangud sa illegal possession of firearms.
