ILOILO CITY – Nagpanawagan si Iloilo City Mayor Jerry Treñas sa mga principals sa mga eskwelahan sa syudad nga suspendiron ang klase sa tion nga tuman na ka taas sang temperatura.
Sa interview sang Bombo Radyo kay Treñas, iya ginpahayag nga tuman na ka init sang tyempo subong.
Ang Department of Education ang nag-reiterate sang Memorandum 37 series of 2022 nga nagahatag sang authority sa mga school heads nga magpatuman sang modular learning sa tion nga may yara sang unfavorable weather and environment conditions.
Suno kay Treñas, dapat nga basehan ini sang mga school heads.
Nagpanugyan naman ang Iloilo City Health Office sa publiko nga magpabilin nga ‘hydrated’ subong nga tuman ka taas sang heat index.
Sa interview sang Bombo Radyo kay Dr. Roland Jay Fortuna, Medical Officer IV, iya ginpahayag nga dapat nga magdala gid sang tubig sa tion nga maggwa sa panimalay.
Dugang pa niya, dapat nga magdala man sang payong ukon kalo sa tion nga magpadulong sa mga lugar nga tuman ka init.
Mas maayo man suno sa natungdan nga magsuksok sang light-colored clothes.
Likawan man ang pag-inom sang alcoholic drinks, sa baylo, magkaon sang prutas nga may mataas nga water content.
Kun may tion suno kay Fortuna, dapat nga magpahuway sang maayo.
Sa subong, ang Iloilo City Health Office ang naga-monitor sang mga heat related-diseases kag mangin sang food and water-borne diseases.
