ILOILO CITY – Arestado ang duha ka mga lalaki matapos nga nadakpan nga nagapakighilawas sa parking lot sang isa ka ilimnan sa distrito sang Mandurriao.
Sa interview sang Bombo Radyo sa security guard nga si Alyas Roel, iya ginpahayag nga yara sa tunga sang duha ka salakyan ang mga lalaki sang iya nga nakit-an.
Suno sa iya, gindumdom niya nga nagahaksanay lamang ang duha apang sang ulihi, nakumpirma niya nga may gina-ubra na nga indi amo ang duha.
Naglawig pa sang halos isa ka minuto ang gin-ubra sang duha ka mga lalaki apisar nga madamo man sang tawo nga nagalabay sa lugar.
Sang nakumpirma na ni Alyas Roel, gintawag niya ang isa pa niya ka upod kag nagpangayo sang assistance sa Mandurriao Police Station.
Ginpanugyanan man nila ang duha ka mga lalaki nga indi insakto ang ila gin-ubra sa pampubliko nga lugar.
Ang lalaki ang ginapahayag residente sang probinsya sang Iloilo samtang ang ginapahayag myembro sang lesbian, gay, bisexual, and transgender (LGBT) ang residente naman sang syudad sang Iloilo.
Sa interview naman sang Bombo Radyo kay Police Lieutenant Jobert Amado, deputy station commander sang Mandurriao Police Station, iya ginpahayag nga mas maayo kun magpasaka sang kaso ang management sang ilimnan agud nga magserbe nga leksyon sa iban nga indi maghimo sang wala nagaka-angay nga butang sa pampubliko nga lugar.
