ILOILO CITY – Kung mag-sick leave gani, magpahuway. Indi na maglagaw!
Isa ka lalaki sa China ang nadula-an sang trabaho kag halos P5 million nga compensation matapos nakit-an nga nagalagaw apisar nga naka-sick leave.
Suno sa report, ginpanindugan sang korte ang nauna nga desisyon may kaangtanan sa termination sang isa ka empleyado nga naga-apelyido sang Xu nga nakit-an nga naga-travel kadungan sang iya duha ka semana nga medical leave.
Ginpahalin siya sa iya trabaho sa isa ka high-tech company sa China matapos ang masobra duha ka dekada nga pagtrabaho.
Base sa isa pa ka report, nag-file sang sick leave si Xu sang 2019 apang gin-reject ini sang iya manager bangud sang ongoing project.
Liwat ini nga nag-file sang July 18-31 kag ginlakip sini ang mga medical certificates bilang pamatuod nga nagasuprer ini sang paglingin sang ulo kag spinal condition nga nagakinahanglan sang bed rest nga gin-aprubahan man sang manager.
Kadungan sang iya medical leave, nakit-an ini sang iya nga kaupod sa trabaho sa isa ka airport sa Hainan kag gin-report ini sa ila nga team lead.
Gintawgan siya apang nagpanindugan ini nga nagtinir siya sa iya balay base sa rekomendasyon sang doctor.
Gin-terminate ini bangud sa “fraud and dishonesty” nga nagresulta sa labor dispute.
Ginpabayad sang labor tribunal ang kompaniya ni Xu bangud sang pagbayolar sang labor laws.
Nag-appeal ang kompaniya kag nag-appeal man si Xu.
Ang rason ni Xu, nagpauli ini sa iya balay sa Hainan agud nga magpahuway.
Apang sang ulihi, gin-apinan sang korte ang kompaniya sa rason nga wala nagpati si Xu sa iya doctor nga magpahuway samtang nga naga-masakit.
