ILOILO CITY – Nagnubo na ang suplay sang iligal nga droga nga nagasulod sa syudad sang Iloilo.
Sa interview sang Bombo Radyo kay Police Colonel Joeresty Coronica, ang director sang Iloilo City Police Office, iya ginpahayag nga ini ang resulta na sang mabaskog nga kampanya sang kapulisan.
Dugang pa niya, ang iban nga durugista ang nagbiya na sa syudad kag nagsaylo sa iban nga lugar.
Sa Luzon masami nagahalin ang droga suno kay Coronica.
Kung madumduman, sang Marso 27, nakuhaan sang P8.1 million nga balor sang iligal nga droga ang isa ka senior citizen nga ginakabig nga courier sang iligal nga droga padulong sa syudad nga nagikan sa Luzon.
Sang damlag lang, nadakpan ang 11 ka mga durugista sa isa ka boarding house sa distrito sang Jaro nga gin-classify nga drug den.
