Nagbuya ang English singer-songwriter nga si Ed Sheeran nga maga-untat na ini sa paghimo sang music kun mapamatud-an nga guilty sa pagkopya sang kanta nga Let’s Get In On nga gin-compose sang classic singer-songwriter nga si Marvin Gaye.
Kasunod ini sang pagka-dismaya nga iya ginpabutyag samtang nagapadayon ang copyright trial sa New York matapos gin-akusaran nga gin-plagiarize ang pyesa ni Gaye kag gingamit man ni Sheeran sa kanta nga Thinking Out Loud nga nangin hit umpisa sang 2014.
Kun malutos si Sheeran sa amo nga copyright case, may yara sang second trial nga patigayunon nga amo ang magatumod sa kantidad nga iya bayaran sa Townsend family.
Ang nagpasaka sang kaso nga plagiarism batok sa 32-anyos nga singer-performer amo ang heirs ni Ed Townsend nga amo ang nag-upod kay Gaye nga nagsulat sang amo nga 1973 hit. Ini amo ang anak ni Townsend nga si Kathryn Townsend Griffin, iya utod nga si Helen McDonald, kag estate sang iya anay asawa nga si Cherrigale Townsend.
“I find it really insulting to devote my whole life to being a performer and a songwriter and have someone diminish it,” pahayag ni Sheeran, kag kun mapamatud-an nga guilty siya, “I’m done — I’m stopping.”
Indi ini ang una nga bes nga napasabak sa korte si Sheeran bangud sa iya trabaho bilang singer. Sang una, napasakaan man ini sang kaso sa iya nga kanta nga Shape Of You apang siya ang nagdaog sa amo nga trial.
Nahibaluan nga samtang yara sa tunga sang kontrobersiya sa copyright infringement, una na nga ginpahayag ni Sheeran nga ipaguwa sini ang album nga ginatig-uluhan nga Subtract sa Mayo 5.
