ILOILO CITY – Ginarespeto ni Iloilo City Councilor Johnny Young ang pagbasura sang kaupdanan sini sa City Council sa iya ginduso nga ordinansa nga naga-regulate sang pagbaligya sang mga ambulant vendors.
Matandaan nga base sa recommendation sang Committee on Trade and Industry, ginbasura ang ginaduso nga ordinansa bangud nga makabig ini nga ‘partial and indiscriminate’.
Sa interview sang Bombo Radyo kay Councilor Young, iya ginpahayag nga wala man nagalain ang iya buot sa nangin desisyon sang komitiba ni Councilor Rudolph Ganzon.
Wala man ini sang plano nga iduso liwat ang amo nga ordinansa bangud nga tun-an pa niya base man sa abiso ni Iloilo City Mayor Jerry Treñas.
Gin-athag ni Young nga wala man gin-suhestiyon sang alkalde nga indi pagdayunon ang ordinansa apang dapat lang niya nga sundon ang desisyon sang komitiba ni Ganzon.
Liwat naman ini nga nagpanindugan nga ang ‘las-5 sa hapon tubtob ‘las-5 sa aga nga gina-allow sa iya ginduso nga ordinansa, wala gina-limit ang pagbaligya sang mga vendors kundi nagbase lamang ini sa Special Services Division.
Dugang pa ni Young, wala man naglain ukon naakig ang mga vendors sa iya ilabi na ang mga naka-intindi magluwas lamang sa katapo sang media.
