ILOILO CITY – Nagahulat sa gihapon si Kabataan Partylist Rep. Raoul Manuel kun san-o malakip sa agenda sang House Committee on Public Works ang iya gin-file nga resolution nga nagapanawagan sang imbestigasyon sa kontrobersyal nga mga flyovers sa Iloilo.
Sa House Resolution 721, nasaad ang plano nga pagpatigayon sang legislative inquiry sa pagpatukod sang depektibo kag atrasado nga Ungka kag Aganan flyovers.
Ang nasambit nga tikang ang sabat sa local resolution nga gin-adopt sang nagligad nga tuig sang mga myembro sang Sangguniang Bayan sa Pavia, Iloilo sa diin nasaad ang ila namutikan nga depekto sa Ungka flyover nga nagapakita sang vertical displacement, indi tupong kag nagakulod-kulod nga dalan nga nagresulta sa pag-stagnant sang tubig.
Gin-call out man sa resolution ang atrasado nga pagtapos sang Aganan flyover nga nagatuga sang problema sa trapiko.
Ini ang nakakuha man sang suporta nagikan sa iban pa nga Ilonggo lawmakers nga sanday Iloilo City Lone District Representative Julienne Baronda, Iloilo Third District Representative Lorenz Defensor, kag Iloilo Second District Representative Michael Gorriceta.
Sa sulod sang duha ka adlaw nga pag-ulan, ginbaha ang Ungka flyover nga naghatag sang huol sa publiko.
Sa interview sang Bombo Radyo kay Rep. Manuel, iya ginpahayag nga dako ang mabulig sang mga kongresista agud nga masolusyunan ang problema sa flyover sa ti-on nga ma-discuss na ang resolution sa House of Representatives.
Ginahulat man sang kongresista ang resulta sang imbestigasyon sang third party consultant.
Sa Lunes, Mayo 8, maga-resume na session sang House of Representatives.
